ياسمين ....

للشاعر الاماراتي المبدع: طارق المحياس


يقول الشاعر عن القصيده : هذي القصيده عباره عن قصه واقعيه صارت لواحد من اعز ربعي .. وكان اسم البنت (ياسمين)





ليش قلبج يا بعد عمري حزين .. والله مو بلايق عليج هذا الزعل
يا حلاتج يوم انتي تضحكين .. افتحي قلبج وقولي وش حصل ؟
من تجرأ من قطف هالياسمين .. من حرمه الزين قبل ما يكتمل
من كسر قلبه وشعوره بكلمتين .. ويدري قلبه للعتب ما يحتمل
منهو ارخص قيمه الغالي الثمين .. ويدري انه في عيوني له محل
ومن يقول الحب ما يقطر حنين .. ومن يقول انه وسط قلبي ذبل



يلا قومي يلا لاتتكيسلين .. خلي حلمي وياج يوصل لي زحل
يلا قومي يلا لاتتشاورين .. خلي حبنا يكون للعالم مثل



قالت اصبر قلت انتي تامرين .. وطالعتني بعين يملاها الوجل
ولا اردايا ذرفت دمعتين .. وقالت ان الزين ابد ما يكتمل ..



قلت قوليلي تراي سرج دفين .. ما بخبر حد لو مهما حصل
بس دخيلج ما ابي هالدمع يبين .. مو بعشان شي بس والله ما احتمل
طالعتني وقلت لها شطالعين .. ماله داعي للعواطف والخجل
هذا مو بوقته في ويهي تسرحين . جاوبي احساس قلبي اللي سأل



قالت الشده بعد فترة تلين .. والفرح يقبل اذا باقي امل
والشقى لازم في يوم انه يهين .. والصعب ياتيه وقت يكون سهل



قلت لها قوليلي ولا تلمحين .. ما احب اسمع كلام به جدل
قولي شالموضوع اذا انج تسمحين .. وخلي الخوف اللي فيني يرتحل



قالت اهلي ساوموني بدرهمين .. وقرروا انهم يزوجوني بعجل
يه خطبني شخص بعمري مرتين .. ويابو المأذون والعقد اكتمل
وافقوا لانهم فماله طامعين .. وبالتجاره والمراكز والفلل
ليش لأ دام انهم رابحين .. يمكن انهم يطلعون بكم محل..‍‍!



قالت إلحقني ومد لي هاليدين .. ضاع فكري وطار من راسي العقل
من لي غيرك اشتكي له يالضنين .. عطني رايك عطني ولو ذره امل
صرت انا وياك ضمن التايهين .. والحزن في دربنا توه استهل
ليش يا دنيا في ويهي تعبسين .. حظي المايل متى بس يعتدل



قالت تكلم ولو بس جملتين .. لا اتم ساكت ترى وردي ذبل
قول اي شي قول لو كلمتين .. وانت اللي بس لامره امتثل



صدمتي كانت معاها صدمتين.. صدمتي كانت في هالمره دبل.
كنت ابي اسالها اشرايج تملجين .. دام اخذنا الدبله والحب اكتمل ..



ما نطقت بشي وانا ميت حزين .. والدمع من فوق وجناتي همل
قمت اشاهق مابي نوحي يبين .. كني خيل باعلى صرخاته صهل



قمنا نطالع بعض عين بعين .. ما تكلمنا إلين الليل علينا حل
قالت انطق لاتقول انزين انزين .. وانا ساكت والفرح عني رحل



كنت اظن احنا لبعضنا مكملين .. مادريت ان الحظ عاند بالفعل
كنت انا وحدي في عالمها سجين .. وكنت اقول الحظ اخيرا اعتدل



قلت لها اذكر كلامج لين الحين .. يوم تقوليلي تراك احسن ريل
صحت فجأه وقلت لها تذكرين . يوم كنا نخطط لشهر العسل ..‍
قلت عشاني قومي ولا تزعلين .. وارضي بالواقع مادام انه حصل
اسمج بيبقى وسط قلبي دفين .. والقمر لازم في يوم بيكتمل
والله بفرح دام انتي بتفرحين . يلا خلينا بعرسج نحتفل
واصفعتني كف عالخد والجبين .. وقالت انت قاعد تكلم طفل..؟



قلت لها وصوتي بنبراته حزين .. اوعديني هالزعل اخر زعل
لانه قلبج ينعرف يوم تزعلين .. والله مو بلايق عليج هذا الزعل
ومهما ناديتج ابد لا تجاوبين .. قصه الحب انتهت .... مات البطل



افترقنا بعد كل هذي السنين .. وللاسف حبنا في هالمره فشل
انتهى مشوار احلى عاشقين ..كلن بدربه ولكن ما وصل
كل واحد ينسى مع مر السنين . لكن الذكرى امرها مو بسهل
لين اخر يوم في عيني تسكنين .. وصورتج تبقى مثل بدر اكتمل



في بعض الاوقات اقعد مستكين .. بس افكر لين يذبحني الملل
بالفعل قطفوا زهور الياسمين .. قطفوا الزهره قبل ما تكتمل

لاحول ولا قوة الا بالله

الجوري شنو سويني فيني خليتي قلبي يرجف في مكانه من قوة ألقصيده ومعانيها الروعه


الله يخليج وعسي عمرج طوييل والي الامام


أنا احب هالنوع من الأشعار ... الأشعار الحزينه ولج ٥ نجووم

المشاركة الأصلية كتبت بواسطة خسرتيني

لاحول ولا قوة الا بالله

الجوري شنو سويني فيني خليتي قلبي يرجف في مكانه من قوة ألقصيده ومعانيها الروعه


الله يخليج وعسي عمرج طوييل والي الامام


أنا احب هالنوع من الأشعار ... الأشعار الحزينه ولج ٥ نجووم

اشوه .. الحمدلله .. عبالي تبي تهاوشني.. وعسى عمرك طويل على مرورك الرائع ..

صح السانج عزيزتي
اختيار رائع
يعطيج العافيه

قصيــدهـ رااائعه وجميله ....<<صرااحه تبجي حييييل

وتسلم ايدج عالنقل الرااائع

يسلم لي هالمرور الراقي.. مشكورين

ياسلام عليج يالجوري وقصيده وقصه بقمة الروعه .

سفير الحب

المشاركة الأصلية كتبت بواسطة سفير الحب

ياسلام عليج يالجوري وقصيده وقصه بقمة الروعه .

سفير الحب

الروووعه مرورك ياخوي.. تسلم ..

صح لسانج

اختيار ررائع


رائعه كلماتها ومعانيها

تسلمي يالغلا

تسلم هالانـآمل ..~

يعطيج العـآفية ..~